dijous, 8 de setembre del 2016

Nàpols - I-2 - p.7 > p.12

01/08 - 12h50 - totjorn a la pizzeria

La pizza, l'ai engolida, èra plan bona. Me demandi s'an de dessèrts, n'ai pas vist enluòc.
Trantalhi per mon programa de la tantossada. Ai enveja de me daissar embriagar per los carrierons. Enveja de caminar al ritme de la vila, entre autos e scooters. 
La relacion pedon-scooter-fiatpanda es plan intima. Vos cal saber que los trepadors, son per i rambar las autos. Del còp, lo pedon camina sus la rota, amb los scooters e las autos. 
E quand lo pedon travèrsa, ont que siague - i a pas de rason que los motorizats aguèsson lo monopòl de l'anarquia, las autos e los petarèls li passan davant, darrièr, juste entre lo taulièr d'un mercant e ma saca d'esquina... e tocaràn pas res! 
Comprenes lo succès de la FiatPanda, es pas solament una istòria de chovinisme economic doblat d'una restriccion budgetària, es una veitura pichoneta e de bon manobrar.
L'auriái degut filmar lo taxista totara que fasiá una marcha enrè per far mièja-vòlta entre tres taulièrs de mercands, quauques pedons, un parelh de scooters, tot en parlant al telefòn. Quin art! 

Trantalhi entre contunhar d'espinchar la vida o seguir un programa de torista, visitar tant e mai, fotografiar fins al regolitge de la carta SD, furnar dins mon guida hachette sus Nàpols
Ai l'astre d'aver la causida, que lo B&B es al còr de tres barris remirables, plan detalhats dins mon guida. Me cal tanben preveire una jornada que prendrai lo tren per anar a Pompèia, a Ercolano e benlèu a Sorrento. 

M'agrada lo tren, m'agrada de descubrir lo país a travès la fenèstra d'un bus o d'un tren, un trajècte impausat que me daissa lo temps de lo remirar. M'agradan tanben los road-trips, engolir los km en auto mas aquí, soi sens veitura per una setmana.

Una setmana sens auto.
Una setmana sens ordinator.
Una setmana sens internet.
De fach, sens ordinator e sens internet, farà en total 12 jorns. Un recòrd. 
Foguèt una decision dificila: partirai sens connexion, sens aver de que me conectar.
Sabi pas se tendrai lo còp.
Una bona experiéncia per tornar a çò que compta vertadièrament. 
Per ara, fa tres jorns que mon telefòn demòra plan silenciós. 
Per m'informar, demandi al mond, es plan agradiu. 

Fin finala, vau escotar la patrona del B&B, vau trepar lo Decumano Maggiore, espèri la Nàpols josterrana. 
Me cal tanben trobar lo cinèma.

12 paginas d'aqueste quasernet d'escrichas ja.
Ai perdut la costuma d'escriure. 
Lo ponhet me fa mal.

2 comentaris:

  1. Bonjorn,

    ses pas sans saber que au mes mòrt i a lu naNoWriMo.
    NaNoWriMo per National Novel Writing Month o dins la linga lemosina Mesada Nacionala d’Escritura d’un Roman.

    Lu NaNoWriMo es ‘na perpausici’ per escriure ne’n una sola mesada 1 roman de quauques 50000 mòts, quauquas 175 pajas. Lu progier desbutet aus USÀ ne’n julhet de 1999 mai 21 personas, e desempuei l’an 2000 la manifestaci’ se passa ne’n novembre. Totparier per lu nom, de « nacionala», lu progier es aura de portada internacionala (e ‘na vetz descuberta la vita dins la galaxia, eu aura ‘na portada intergalactica).

    Ne’n 2005, i aguet 59000 personas de marcadas que 10000 arribeten a chabar lu concors.

    Coma quò se passa :

    Lu roman pòt estre escrich sus quau sugier que ‘quò siguesse e dins la linga qu’es per vos plar.

    Lu o la participant-a deu se marcar sus lu site oficiau (fau pas contar m’i veire se qu’es d’enquera un façacolha… )

    Lu roman deu estre desbutat lu 1er de novembre passat mieinuech e ‘chabat lu 30 de novembre avant la minjanueit. Es permes de far ‘na planificaci’ de son trabalh tot coma prener de las nòtas per trabalhar, mas, quò qu’es pas permetut, es d’escriure un quauquares « que seria dins lu cors » dau roman avant l’ora.

    I a de las questions per saber se vau mielhs escriur un roman complet, o, los 50000 prumiers mòts d’un roman (seriosament ? ).

    Recompenças :

    I a grán res de ganhar en defòra de ma reconaissança eternèla, perdon, fòra far l’eisercici sans se’n contar.

    I a un papieron que se pòt imprimar quante i setz ‘ribat-ada, i a maitot daus foròms per ne’n parlar (mas vos fau los charchar !).

    Cultura :

    La gent que iò fan deven escrire quauquas 4 pajas per jorn, quauques 1700 mòts (per eisemple ‘queu bilhet comporta un pauc mai de 500 mòts).

    De segur que lu temps mancará per se legir e tornar legir, quò que fai que los organisators son per privilegiar lu fach de se sietar solament e d’escriure, sans se’n far per la qualitat, la data limita es lu marquor per far.

    Chris Baty, lu fondator dau NaNoWriMo escriguet un libre « No Plot? No Problem! » (l’ai pas legit) que la filosofia se resuma per

    « la quantitat, pas la qualitat ».

    I a d’autra gent per far un NaNoFiMo, Fi per Finir, ‘chabar, paufinar ne’n decembre, e, un NaNoEdMo, Ed per Esditar, ne’n març.

    Lu site dins la linga de la H2 http://nanowrimo.org/

    Ne'n 2014 iò faguí (mon objectiu eriá de 1000 mòts per jorn) e me faguí plaser d'impimar la chausa (ai d'enquera dos libretons « papier » de balhar (fau me damandar).
    L'an passat, iò 'chabí pas, mas ujan tòrne iò far.

    JP Bertand

    ResponElimina
  2. Aquò's plan ambiciós, mas es una crana idèa!
    i vau soscar :)
    mercés la RApieta!

    ResponElimina

Mercé :)