dimecres, 26 de novembre del 2014

Stop stop stop!

Ai un problèma.

Rai, n'ai mai d'un de problèma.

Mas n'ai un de particular amb las caucetas.
Ja sabiatz que secuti psicologicament lo mond que gausan aver lo marrit gost de cargar de caucetas dins de sandalas. (mas dins ma granda mansuetud, o perdoni al mond d'Euròpa del Nòrd, l'excusa de la diferéncia culturala)

E ben figuratz-vos que l'autre jorn dins lo tren, i aviá un tipe qu'aviá cargat los mocassins sens caucetas! 

Ja, primièra error : cargar de mocassins.
Lo mocassin fa mafiós de las annadas 80.
Fa film amb Al Pacino o John Travolta.
E sénhers, vòli pas dire mas Al Pacino e John Travolta son pas mai d'icònas de referéncia dempuèi l'an pebre. Updatatz-vos un pauc!

Segonda error, de mocassins sens caucetas.
Aquò vòl dire que lo tipe quand se descauça, es Hiroshima.
E quand bolega un pauc los artelhs, coma li son tròp grands los mocassins, s'escapa pels costats un fum invisible, catastròfa nucleària made in artelhs.
Un pauc coma amb las balarinas. Perque anetz pas creire que passi mon temps a criticar lo marrit gost e las odors dels òmes, nani. I a las femnas tanben. Mas quora passarà aquela puta mòda de la balarina ? La balarina pudís, es pas confortabla, es pas bon per l'esquina, t'embocana e mai que mai, aquò's pas polit. Non, domaisèlas o vielhassas, la balarina aquò's pas polit. E embocana. Aquò te sembla una barca mal dessenhada qu'auriá servat la nifla a muscle passit. 
Escapatz-vos de vòstra preson fashionista e quand auretz los uèlhs que se pausaràn sus las vòstras de balarinas, auretz la revelacion del marrit gost. Free your bon gost, macarel! 

Resumit :
Las sandalas amb las caucetas : non
Los mocassins sens caucetas : non
Los mocassins tot cort : non tanpauc !

I a una categoria mai, que fa moment que n'ai pas vist d'aqueles, son fòra-concors campions del monde : los que cargan de mocassins negres amb de caucetas de tennis blancas (sabètz de las que son pas caras a Decatlon !)
O disi un còp e o vos tornarai pas dire : las caucetas negras de Decatlon son pas mai caras que las blancas, avètz pas d'excusas.
Vaquí.

Es important.

Que ieu, de te veire un tipe amb de mocassins sens caucetas, d'ora lo matin dins lo tren, e ben aquò me gasta la jornada.  



4 comentaris:

  1. jp la rapieta27/11/14 8:58

    Ben aürós de te tornar veire, afe, legir.
    Manca los que van ne'n chaucetas sens chauçuras.

    JP
    :p

    ResponElimina
  2. E ben, dròlla, per un còp siái PAS d'acòrdi ambe tu : adòri las "balarinas" e justament, los pès an plan d'aire que i a pas tròp de cuèr...
    Contenta de ton retorn, plan segur !

    ResponElimina
  3. Jèsucrist se prenguèt tres jorns per ressuscitar. A Mèl li a calgut un pauc mai.
    Ton retorn es una bona novèla. Soi d'acòrdi en tot. Los mocasins, las caucetas blancas, los mocasins amb de caucetas blancas, las sandalas amb de caucetas en quina color que siague... son afroses.
    E aquò's egal per las sabatas "boston". M'agradan pas las sabatas pertusadas qu'a mitat. Los usatgièrs de sabatas a mitat pertusar las i pertusariái amb los artelhs dedins.
    Soi tolerant en politica, mas pas en l'eqüació marrit gost per las sabatas.
    E que se passèt amb lo tipe de l'eslip?

    Manèl

    ResponElimina
  4. Flòriverd9/12/14 14:55

    Mocassins ses caucetas, lo fum invisible que sembla un Hiroshimatonet, òòòc… una catastròfa ecocògic coma qualques pichons plasers de la vida…

    http://melanizetofre.blogspot.fr/2013/02/los-pichons-plasers-de-la-vida.html

    ResponElimina

Mercé :)