Coma demòri dins las paluns, soi una acostumada dels moissaus. Me'n planhi pas, que, se soi pas contenta, ai pas que de me tirar d'aquí per viure a la montanha. Pas coma aqueles conasses que vòlon l'estanh, mas pas las bestiòtas qu'èran aquí abans eles.
Quand siás d'aquí, lo moissau, n'as la costuma. E sabes cossí conviure amb el.
La nuèch, quand, per malastre, n'as un qu'es dintrat dins la cambra, te cal atudar lo lum, tancar los uèlhs e l'esperar. Que lo moissau, es un petós e espèra l'escuretat per t'atacar.
E aquí, l'ausisses. E te cal concentrar a fons de fons sus doas causas : l'ausida, per escotar lo bronzinament viciós de la moissala atalentada e ta pèl, ont se pausarà la puta? Perque se siás ben concentrat, sentisses sas patòtas se pausar sus ta pèl ultrasensibla.
E un còp que s'es pausada la puta de moissala atalentada : PAF lo moissau!
Puèi, alucas lo lum, agachas la causòta grisa espotida sus tos dets o dins la pauma de ta man e t'escacalassas de ton rire mai sadic.
Un tròç de vida ideala dins las paluns.
Levat que ongan, avèm de moissaus mutants : fan pas de bruch, pesan pas res e los veses pas. Mèrda, e mai los moissaus son d'OGM ara!!
Alara, te desrevelhas la nuèch amb l'esquina que te pica grèu e començas de comptar un, dos, tres, quatre, cinc... tròp.
As maitas solucions :
- mudar, partir a la montanha. Non, cal pas desconar, òu.
- barrar la fenèstra per legir. A ben non, cal profechar de l'airet fresc de la nuèch
- pas legir dins lo lièch. Ja que i biqui pas gaire dins mon lièch, se en mai d'aquò, i legissi pas mai, de qué demòra coma pichòt plaser de la vida???
- ventilator fòrça 4.
Darrièra solucion adoptada. Lei de vida palunièra : pas de moissaus quand i a de vent.
Levat que quand as lo vent que bufa dins la cambra, te cal tornar cargar lo pijama qu'aviás doblidat coma aviás doblidat lo camin per anar trabalhar. D'aquí a ne dedusir que lo pijama e lo trabalh van cotria...
E fonciona?
E ben pas completament.
L'autre jorn, una soleta fissadura.
Dins l'esquina.
Sabes just a aquel centimètre cairat plan centrat jols omoplats que pòdes pas atènher de cap biais, que te tòrces los braces, las mans e l'esquina coma una contorsionista chinesa e pas mejan de te gratar.
Qu'una puta de bèstia te fisse e que te pòscas pas gratar, aquò's la cachavièlha suprèma.
La contrataca es intelligenta : lo pijama-burca.
Passaràn pas!
Adieu, sapque los moissaus foguèron importat pels torist!! E oc en fach lo gros cosin qu'el pica pas e ben l'aimavan pas los toristes a donc an implantat un especia mai pichota... Que PICA!!!!
ResponEliminaQue balha hami de víver per vòste !
ResponEliminaVam, qu'èi plan notat qu'avès comprés de que los qui pican, e ben, que son LAS qui pican. N'i a pas que fumèlas entà har un acte tant viciós...
Que deurés hicar ua mosquitèra a la frinèsta (=hrièsta) ; qu'empachan (las mosquitèras) aus fenhants de dintrar, mas ne't cau pas deishar las pòrtas dubèrtas si que non los valents dintran a pè…
ResponEliminaJo, que'm permet de m'amusar a trabalhar lanuèit ; atau los brossalons asiatics ne dintran pas tanpauc
Per çò que n'es de gratèra, que't cau, coma d'unes animaus,fretar l'esquia contra l'enquadrament de la pòrta.
O encara, que prengues ua bròca (quauqu'un com tu que ne deu aver ende las longas seradas d'ivèrn) e que hès damb era…
O encara, que demandas au ton amorós, quitament se n'es pas sonque de passatge…
Cal trobar un amoiros amb la pel fina fina. Es lo metode dich "lo bicar sens lo picar".
ResponEliminaPòdes levar l'opcion "se'n anar a la montanha". Dempuèi un detzenat d'ans, son montats los moissals... :(
ResponElimina