dimarts, 14 de juny del 2011

Cooperativa



Las cooperativas, bastiments bèls, fan partida del païsatge dels vilatges lengadocians. Los bastiments bèls e vesedors, son totjorn o sus una plaça, o sus una rota, i passam sovent dabans.
O puslèu i passaviam sovent dabans. Que de cooperativas, e ben n'i a de mens en mens.
Tu que siás pas de Lengadòc Bas, te vau explicar de qu'es aquò una cooperativa. 


La cava cooperativa, dins lo vilatge, aquò èra lo punt convergent del mes de setembre. Los tractors i anavan portar lo rasim de la vendèmia e los escolans, aprèp l'escòla, veniam veire cossí lo tractor vuejava lo rasim dins de tinas bèlas, que dedins i aviá una causa en coa de tira-tap que te matrassava tot aquò. Caliá ben far mèfi de pas tombar dins la tina. Disián que lo David, lo filh dels emigrats espanhòls, èra tombat dedins pichonet, qu'aquò te l'aviá trepanat e qu'es per aquò qu'es nèci e que t'agacha de guingòi...

Totas las vinhas de Miraval e de Vic portavan lo rasim a la Cooperativa de Miraval, aquò te fasiá un rambalh de tractors qu'anavan e venián tot lo jorn, vos disi pas. E los dròlles que s'enchusclavan de l'espectacle, de l'odor e dels rasims raubats. E los vièlhs qu'agachavan. E los pas vièlhs qu'èran aquí tanben. Lo luòc de vida del vilatge pendent un mes. L'economia del vilatge per l'annada.


Mas la cooperativa de Miraval, l'an tombada, e a la plaça , t'i an fotut un parking.

A Gijan, la cooperativa,l'an tombada tanben , e a la plaça, i faràn de lotjaments.


Lo parquing en plaça de la Cooperativa

Ai totjorn d'emocion quand vesi una cooperativa.
Benlèu per la filosofia, tot lo mond pòrta son trabalh al meteis luòc, tot per totes, totes per tot, e per aquel centre de vida qu'aquò representa totjorn per ieu.

Cooperativas e vinhas, es çò meme, ne demòran pas gaire.
Benlèu perque a la plaça de las vinhas, i a de “lotissements du soleil”.
Benlèu perque los que demòran se'n sortisson melhor en se montar en vinhairon independent. 


Alara, lo bastiment tan bèl, e ben, sovent, las comunas aiman melhor ne far quicòm mai.
Enfin, destrusir una cooperativa per ne far un detzenat de plaças de parquing me sembla colhon....

Pas luènh de l'ostal, demòra la Cooperativa bèla, es polida aquela, m'agrada, la de Frontinhan. Espèri que barrarà pas aquela. I pòrtan lo muscat. Òc, lo famós muscat de Frontinhan, AOC, que se un Pescaluna o un Burro vos ditz que lo de Lunèu o lo de Rivesaltes es melhor, los cregatz pas. 


Mas aquí tanben i a de mai en mai de vinhairons independents, non, pas vertat, i a puslèu de mens en mens de pichons vinhairons amb sas quatre vinhas. Las vinhas, rapòrta mai de las vendre. E un lotissament de mai, un. Quant de temps durarà encara aquela de cooperativa amb sa destilariá cooperativa de l'autre costat de la rota? 
Vinha assauvatgida

I a encara de luòcs ont ne podèm veire de cooperativas. Sabi pas se i son perque servisson encara o perque la comuna a pas agut lo besonh (o los sòus) de las tombar. S'anatz dins lo rèire país besierenc, ne veiretz de cooperativas... dins lo Lengadòc Bas totjorn, mas mens pròche de la mar. 

Aquí, la pagam car la mar. Cada metre cairat deu èsser rentabilizat. 

Una cava (isto)rica de Miraval qu'a barrat,
faràn de lotjaments a la plaça... 

E lo paure vinhairon qu'anava a la cooperativa, de qué fa quand sa cooperativa barra? E ben, o fa lo vinhairon independent, mas aquí cal de sòus. O va a la cooperativa mai pròcha qu'es totjorn plan luènh, e se descoratja. O arrèsta. E vend. E una vinha de mens, una.
A la plaça dels socs, aurem d'ostals pels retirats franchimands que vòlon vielhir al solelh, o de gàbias pels toristas, o una zona comerciala.




Benlèu vos demandatz de qué me peta uèi a vos parlar d'aquò. E ben, es que l'autre jorn, passèri dabans una cooperativa "reciclada".

Agachatz-me çò que n'an fach :


T'an fotut un LIDL dins una cooperativa.
T'an fotut l'esclavagista del discount dins una cooperativa.

De còps que i a, lo subrerealisme es dolorós.

3 comentaris:

  1. d'acòrdi mas te cal reconeisser que l'integracion arquitecturala es capitada.

    ResponElimina
  2. Me siái daissat dire que lo melhor de muscat es aquel de Sant-Joan de Menerbés? Me siái daissat dire tanben que d'unes "glorioses" de Frontinhan apondián fa pas gaire un pauc de sambuc dins son vin blanc per ne faire de muscat.
    E siái a me dire que benlèu aquò te va empepinar alara m'afani per apondre que pel demai dau pòst siái d'a fons d'acòrdi a 200%. De còps que i a, as malastrosament e dolentosament rason.

    ResponElimina
  3. Que comprengui ara perque Pasteur a [auré ?] dit qu'un veirat de vin èra bon tà la santat !
    Que i demorava…

    ResponElimina

Mercé :)