Mai que mai, lo festenal d'Òrb

Amb la Marieta e lo Pèire de la Sauma, dissabte anèrem passar la jornada a Colombièras d'Òrb pel festenal Mai que Mai.


Primièr, trobar un luòc polit per manjar:

Manjar: (avètz vist aqueste sens de las prioritats?)Faire lo penequet dins un luòc agradiu:
Puèi anèrem jogar a la quina.
Aaaaa, la quina. Soi fan fan fan
E una quina en occitan, si señor! Pas gaire de mond, mas akò se comprend, tot lo mond sap que lo mes de mai es pas mai la sason de las quinas. La quina akò se fa quand fa freg e qu'as besonh de ganhar de cambajon e un litre d'òli. (me'n caldrà parlar un d'akestes jorns). Mon uèlh aluserpit, quand veguèt lo pauc de mond que i aviá, mandèt l'informacion a mas cervèlas cupidas que mandèron a ma boca sensuala (es mon blòg, ai lo drech d'escriure qu'ai una boca sensuala) un "ooooooo (fau lo lop se vòli), se i a pas gaire de mond, estadisticament, podèm ganhar (ai fach opcion mats al bac).
E, vejatz, sus aquesta partida, "esperèri" 4 còps:
Quin estrés, macarèl!

Lo Pèire de la Suma, akesta puta, ganhèt un carton de vin roge del Mas de l'Ametlièr d'Henri Cros un vinhairon dels polits uèlhs blaus que fa de bon vin e que marca sus sos cartrons:"Tant que nòstres veires, beurem de vin de Cròs, Pus plasenta serà la vida, e mai galhards lo nòstre còs". Èra tras que content lo Pèire de la Sauma d'aver ganhat de vin ;)

E mai tard, ieu ganhèri una banasta, YESSSSS,
de qué i aviá dins ma banasta: de ceses (ne farai de homos se soi motivada), de vin d'Òrb, de friton de rit (que es tombat del frigò e adiu la topineta... ), de confitura de castanhas, de mèl de bruga, de crema de noses, un librilhon sus Bedarius, una topina d'olivas de Clarmont d'Erau (qu'an l'òli melhor dau mond). Kò's polit!
Per l'istòria , ieu , ganhi pas jamai. ganhèri un còp quand èri pichòta 5 litres d'òli (d'òli de virasolelh que valiá pas res), puèi quand èri mai grandeta, ganhèri una caissa de carn de sai pas quantes quilos (akò valiá lo còp) que mon paire s'i copèt una dent sus una costèla (istòria tirada de l'antologia familiala).
E dissabte, ganhèri un segond còp!!! Ganhèri "la consolanta" , alara la consolanta, akò's pas un consolaire que te donan, es una quina de mai, mas coma es la darrièra, te li an trobat un polit nom. E de que i aviá dins la consolanta! Un disc de la Talvera e... "des produits amincissants". Anatz-i, trufatz-vos. (monamorósmaicontent ne ritz encara...)

Se consolèrem de tant ganhar amb los pescajons portats per la Celina de la Talvera per festejar son aniversari, sus la fòto podètz veire lo vin ganhat, la mèl, la confitura, la crema de noses:
Passejèrem per Colombièras. Òrb es un polit país, i tornarai!
Lo vèspre, dancèrem al concert de la Talvera. Fasiá un an que los aviái pas vistes la Talvera en concert. Akò fa de ben!
Soi totjorn fan fan fan. Que son booooooooooooooooooooooons.
Seràn a Olonzac lo 21 de Junh.


Foguèt una jornada excellenta. Òsca als organizators del Festenal Mai que mai.
E òsca a nosautres:

La Marieta, ieu, lo Pèire de la Sauma

.