divendres, 14 de desembre del 2007

Bronquiti

Uèi soi malauta.
Pas de res de grèu. Una bronquiti.
I soi acostumada.
Dempuèi pichona, son los palmons que prenon: asma e bronquiti.
(familha de fumaires, vos granmercegi pas...)

Fasiá tres ans que me pegavi d'anginas, ben non, ongan, tòrni a la costuma: bronquiti.

Alara queste matin, laJefa m'es venguda veire. E ieu quand soi malauta, te fau tot un cinèma amb una cara pallinèla, una votz pichoneta e fau "soi malauta". Genre, se me coneisses pas, sònas lèu-lèu lo capelan per lo darrièr ciri la darrièra onccion (es akò? rai?). Mas LaJefa o sap que soi una comediana, se daissa pas enganar, la puta. Mas sap tanben que mentissi pas.
Alara, aqueste matin, es anada raubar a la Pomponeta la topineta de Vicks Vaporub.



Vicks Vaporub, es l'odor de l'ivèrn.
Ivèrn, n'i a que pensan a Nadal, a l'esquí, al freg, a la nèu, ben ieu pensi a Vicks Vaporub.

Me ramenta una reclama que passava a la television espanhòla e que capiti pas de trobar ( Youtube m'a trahie...) qu'una pichòta tosissiá e disiá a sa maire "no puedo respirar, no puedo ir al cole"... .
Coma Youtube me traís, vos imiti la pichòta:boomp3.com
(o sabi, l'imiti tras que plan)

Alara l'ivèrn, de pichona, aviái drech al Vicks Vaporub, dabans, darrièr (e per totes los traucs). Esnifavi lo Vicks Vaporub. Ah esnifar lo Vicks Vaporub, un grand moment de solesa! Siás tota sola, amb ton aiga cauda, que i metes UN culhièr e esnifas. Inspiiiiiiiiiiiiiiiras lo dakòs caud que te crama tot al passatge mas lo micròbi missantàs que te fa escupir jaune-vèrd, el demòra.
E se metes mai d'un culhièr dins ton bòl d'aiga, es Chernòbil dins ton nas, dins ta garganta, dins tos palmons, implosion, cervèlas out.
Alara ma maire, qu'es famosa per son bon gost, per me faire esnifar lo VIcks Vaporub, aviá doas solucions:
-l'inalator blanc , un dakòs que sembla lo dakòs que los òmes i fan pipí dedins a l'espital. Esperatsz, vos meti una fòto:- lo bòl d'aiga cauda, amb LO culhièr de Vicks Vaporub, e per que la vapor(ub) siá pas perduda, una servieta sul cap. As pas l'èr con, t'o pòdi dire. Non, akí, i a pas de fòtos.


E aqueste matin, LaJefa me pòrta la topineta de VicksVaporub - es brava, mas un còp fa pas puta, que de costuma, quand soi malauta, me fot un còp de pè al cuol "cala-te e avança".
Me vicksvaporubizi.
E tòrni jol plumon (enfin, l'aviái pas daissat...)

Puèi akí m'arriba la nolor.
Mièg menta, mièg eucalipt, total VicksVaporub.

Ai las meteissas malautiás que quand aviái 8 ans.
Ai los meteisses remèdis.


Evolucioni pas.





Suplements multimèdias:
- una cançon nullassa , mas soi malauta, ai lo drech de vos torturar:

boomp3.com

- doas reclamas de Vicks Vaporub , quina vos agrada mai?





- e una reclama que tròbi de marrit gost...




L'autora del blòg granmerceja la Pomponeta per sa contribucion a una garison futura.


.

4 comentaris:

  1. Apres escotar ton imitacion de la pub de Vicks Vaporub, sabem que çò que vòles es pas anar trabalhar la semana que ven... CORATGE!!!

    ResponElimina
  2. pfff, tu parles Charles,
    diluns, petarai la fòrma! :)

    ResponElimina
  3. Comencem peu començament.En prumièr, qu'èi pogut audir l'imitacion, gràcias au Firefox (normaument m'estau dab Safari, mès èi degut cambiar justament per'amor de las toas videos que de tota faiçon non miri pas -enfin aquò depen :-)). Bon, bref: l'èi audida l'imitacion. He ben, suu còp e sens i pensar mèi, m'a hèit desgahar lo plan A d'urgència de desinfeccion contra l'epidémia de gripa aviària. Per cavilhats que siin los Macs, non vòli pas préner nat risc.
    E las videos? Las duas versions m'agradan, tant l'italiana com la neerlandesa. En tot cas, ès en fòrma quan ès malauta, tu! Lo ton messatge m'a hèit plegar d'arríder. Qu'aquò non t'empache pas de guarir lèu! S'èi plan comprés la video, deurés estar guarida uei. Ns'ac diràs!

    ResponElimina
  4. sustot merceges pas lajefa es pas la pena ..es ela qu'a montat dos còps los escalièrs per te lo donar lo topinon!
    enfin un còp ......

    ResponElimina

Mercé :)